ឆ្នាំនេះ យើងនឹងអាចឃើញ Apple ប្រកាសចេញបន្ទះសាកថ្មឥតខ្សែថ្មី, AirTags និងកាសលំដាប់កំពូលថ្មីក្រោមម៉ាក Apple?

លោក Ming-Chi Kuo ដែលជាអ្នកវិភាគជំនាញ ផ្នែកខាងឧបករណ៍អេឡិចត្រូនិក បានត្រឡប់មកវិញសាជាថ្មីម្ដងទៀតហើយ រីឯលើកនេះ គាត់បានចែករំលែកដំណឹងថ្មីៗជាច្រើន អំពីផលិតផលរបស់ក្រុមហ៊ុន Apple ដែលអាចនឹងបង្ហាញខ្លួនក្នុងឆ្នាំ 2020 នេះតែម្ដង។ ផលិតផលថ្មីៗទាំងអស់នោះ រួមមានដូចជាបន្ទះសាកថ្មឥតខ្សែស៊េរីថ្មី (ប្រភេទកម្រិតទាបជាង AirPower ដែលមិនបានចេញជាផ្លូវការ) ក៏ដូចជាឧបករណ៍តាមដាន AirTags ព្រមទាំងកាសពាក់ក្បាលផងដែរ។


ខណៈពេលដែល ឧបករណ៍បន្ទះសាកថ្មឥតខ្សែ AirPower ត្រូវបានប្រកាសពីវត្តមាននៅដើមឆ្នាំ 2018 ហើយក្រោយមក ក៏ត្រូវលុបចោលគម្រោងវិញនៅឆ្នាំ 2019 កន្លងទៅនេះ ដោយឡែកលោក Kuo បានអះអាងមកថា Apple មិនបោះបង់វាចោលទាំងស្រុងនោះទេ ហើយកំពុងតែត្រៀមប្រកាសចេញប្រភេទ AirPower Mini ឬកម្រិតលឿនទាប នៅក្នុងឆ្នាំនេះជាមុនសិន។ អ្វីដែលយើងបានដឹងតិចតួចពី Apple ប្រាកដជាឧបករណ៍តាមដានទីតាំង AirTags ថ្មីនេះហើយ ដែលវាដូចជាដុំ GPS តូចមួយ សម្រាប់ទុកដាក់ក្នុងសាកាដូ ឬ កាបូប ក៏ដូចជាបំពាក់ជាប់សោ ឬកង់នានា ដើម្បីអនុញ្ញាតឲ្យយើងតាមដានទីកន្លែង របស់វត្ថុទាំងអស់នោះចេញពី iPhone ភ្លាមៗថែមទៀតផង។ លើសពីនេះ លោក Kuo ក៏បានបង្ហើបប្រាប់ទៀតថា Apple ក៏បានសិក្សាលើកាសពាក់ក្បាលលំដាប់កំពូល ក្រោមម៉ាករបស់ខ្លួនឯងផ្ទាល់ អស់រយៈពេលប៉ុន្មានឆ្នាំមកហើយ ដោយវាគ្រោងនឹងបង្ហាញខ្លួនក្នុងឆ្នាំនេះដូចគ្នា។

ស្របនឹងស្ថានភាពពេលឥឡូវនេះផង លោក Kuo ក៏បានលើកឡើងថា ព្រោះតែការរីករាលដាលនៃវីរុសកូរ៉ូណា ដូច្នេះផលិតកម្មរបស់ឧបករណ៍ទាំងនោះ អាចនឹងត្រូវពន្យាពេលក៏ថាបានដែរ ដូច្នេះវាពឹងផ្អែកទៅលើក្រុមហ៊ុនផ្គត់ផ្គង់ប៉ុណ្ណោះ ទៅលើបញ្ហាមួយនេះ។ ក្នុងចំណោមឧបករណ៍ថ្មីៗខាងលើនេះ តើប្រិយមិត្តអ្នកអាន ចាប់អារម្មណ៍លើមួយណាជាងគេ?